ಕೇರಳ; ಶಬರಿಮಲೆ (Sabarimala) ಶ್ರೀಅಯ್ಯಪ್ಪ ಸ್ವಾಮಿ ಸನ್ನಿಧಾನಕ್ಕೆ ತೆರಳುವ ಲಕ್ಷಾಂತರ ಭಕ್ತರಿಗೆ ಇಲ್ಲಿನ ದೇವಸ್ವಂ ಮಂಡಳಿ ಅನ್ನದಾನ ಸೌಲಭ್ಯ ಒದಗಿಸುತ್ತಿದೆ.
ಪ್ರತೀದಿನ 10 ಸಾವಿರಕ್ಕೂ ಹೆಚ್ಚು ಭಕ್ತರು ಅನ್ನದಾನದಲ್ಲಿ ಭಾಗವಹಿಸುತ್ತಾರೆ. ಈ ವರ್ಷ ದೇವಾಲಯ ತೆರೆದಾಗಿನಿಂದ ಇಲ್ಲಿ ಊಟ ಮಾಡಿದವರ ಸಂಖ್ಯೆ ಮೊನ್ನೆ ಶನಿವಾರದ ವೇಳೆಗೆ ಒಂದು ಲಕ್ಷ ದಾಟಿದೆ ಎನ್ನಲಾಗಿದೆ.
ಇದು ಏಷ್ಯಾದ ಅತಿದೊಡ್ಡ ಅನ್ನದಾನ ಭವನಗಳಲ್ಲಿ ಒಂದು. ದೇವಾಲಯ ತೆರೆದಿರುವ ಪ್ರತಿದಿನ, ಮಾಸಿಕ ಪೂಜೆಗಳಿಗೂ ಸೇರಿದಂತೆ ಅನ್ನದಾನ ಒದಗಿಸಲಾಗುತ್ತದೆ. ಜನವರಿಯಲ್ಲಿ ನಡೆಯಲಿರುವ ಮಕರವಿಳಕ್ಕು ಉತ್ಸವಕ್ಕಾಗಿ ವಿಶೇಷ ವ್ಯವಸ್ಥೆಗಳನ್ನು ಮಾಡಲಾಗುತ್ತದೆ.
“ಅನ್ನದಾನದ ಉಸ್ತುವಾರಿ ವಹಿಸಿಕೊಂಡಿರುವ ವಿಶೇಷ ಅಧಿಕಾರಿ ಸುನಿಲ್ ಕುಮಾರ್ ಸುದ್ದಿಗಾರರೊಂದಿಗೆ ಮಾತನಾಡಿ, ಹೆಚ್ಚಿನ ಸಂಖ್ಯೆಯ ಭಕ್ತರಿದ್ದರೂ ಆಹಾರವನ್ನು ಸ್ವಚ್ಛ ಮತ್ತು ಯಾವುದೇ ದೂರುಗಳಿಲ್ಲದೆ ಬಡಿಸಲು ಸಾಧ್ಯವಾಗುತ್ತಿದೆ ಎಂದು ಹೇಳಿದರು.
ಅಡುಗೆ, ಬಡಿಸುವುದು ಮತ್ತು ಸ್ವಚ್ಛತೆಗೆ 235 ಸಿಬ್ಬಂದಿ ಇದ್ದಾರೆ. ಭಕ್ತರು ಬಳಸುವ ತಟ್ಟೆಗಳು ಮತ್ತು ಲೋಟಗಳನ್ನು ಮೊದಲು ಅವರು ತೊಳೆದು ನಂತರ ಬಿಸಿ ನೀರಿನಿಂದ ಡಿಶ್ವಾಶರ್ ಬಳಸಿ ಮತ್ತೆ ಸ್ವಚ್ಛಗೊಳಿಸಲಾಗುತ್ತದೆ.
ಏಕಕಾಲದಲ್ಲಿ ಸುಮಾರು ಸಾವಿರ ಜನರಿಗೆ ಊಟ ಉಣಬಡಿಸಬಹುದು ಮತ್ತು ಜನಸಂದಣಿ ಹೆಚ್ಚಾದಂತೆ ಹೆಚ್ಚಿನ ಜನರಿಗೆ ಅವಕಾಶ ಕಲ್ಪಿಸಲು ವ್ಯವಸ್ಥೆ ಮಾಡಲಾಗುತ್ತದೆ.
ಮಳಿಕಪ್ಪುರಂ ದೇವಾಲಯದ ಹಿಂದಿರುವ ಶಬರಿಮಲೆ ಅನ್ನದಾನ ಭವನವು ಏಷ್ಯಾದ ಅತಿದೊಡ್ಡ ಅನ್ನದಾನ ಭವನಗಳಲ್ಲಿ ಒಂದಾಗಿದೆ ಎಂದು ಹೇಳಿದ್ದಾರೆ.
