ಕೇರಳ: ಪ್ರಸಿದ್ಧ ಶಬರಿಮಲೆ (Sabarimala) ಅಯ್ಯಪ್ಪ ಸ್ವಾಮಿ ದರ್ಶನವು ಕಳೆದ ವಾರದಿಂದ ಆರಂಭವಾಗಿದೆ. ಈ ವೇಳೆ ಭಾರೀ ಗೊಂದಲ ಹಾಗೂ ಆತಂಕದಿಂದ ಕೂಡಿದೆ. ಭಾರೀ ಜನ ಸಂದಣೆ ಆಗುತ್ತಿದ್ದು, ಭಕ್ತರ ಸಂಖ್ಯೆ ಹೆಚ್ಚಳವಾಗುತ್ತಿದೆ ಎಂದು ನ್ಯೂಸ್ ಚಾನಲ್ ಹಾಗೂ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋಗಳು ವೈರಲ್ ಆಗಿವೆ.
ಈ ಕುರಿತು ದೊಡ್ಡಬಳ್ಳಾಪುರದಿಂದ ತೆರಳಿರುವ ಮಾಲಾಧಾರಿಗಳು ಶುಭ ಸಂದೇಶವನ್ನು ನೀಡಿದ್ದು, ನ್ಯೂಸ್ ಚಾನಲ್ ಗಳಲ್ಲಿ ವರದಿಯಾದಂತೆ ಯಾವುದೇ ಆತಂಕಕಾರಿ ಪರಿಸ್ಥಿತಿ ಶಬರಿಮಲೆಯಲ್ಲಿ ಇಲ್ಲವೆಂದು ತಿಳಿದುಬಂದಿದೆ.
ಮಲ್ಲತ್ತಹಳ್ಳಿ ಚಂದ್ರಶೇಖರ್ ಸ್ವಾಮಿ ಅವರ ನೇತೃತ್ವದಲ್ಲಿ, ದೊಡ್ಡಬಳ್ಳಾಪುರ ಅಯ್ಯಪ್ಪ ಸ್ವಾಮಿ ದೇವಾಲಯದಿಂದ ಇರುಮುಡಿ ಹೊತ್ತು ಶಬರಿಮಲೆ ಯಾತ್ರೆ ತೆರಳಿರುವ ತಂಡ ಸುಮಾರು 20 ನಿಮಿಷಗಳಲ್ಲಿ ಅಯ್ಯಪ್ಪ ಸ್ವಾಮಿಯ ದರ್ಶನ ಪಡೆದಿದ್ದಾರೆ.
ಕೆಲ ಖಾಸಗಿ ಚಾನೆಲ್ ಹಾಗೂ ಸಾಮಾಜಿಕ ಜಾಲತಾಣದಲ್ಲಿ ಕೇರಳ ಸರ್ಕಾರವು ಈ ಬಾರಿ ಶಬರಿಮಲೆ ಅಯ್ಯಪ್ಪ ಸ್ವಾಮಿ ದರ್ಶನಕ್ಕೆ ಬರುವವರಿಗೆ ಸೂಕ್ತ ವ್ಯವಸ್ಥೆಯನ್ನು ಮಾಡಿಲ್ಲ ಎಂಬ ಆರೋಪ ಕೇಳಿ ಬಂದಿತ್ತು.
ಅಲ್ಲದೆ ತಮಿಳುನಾಡು ಬಿಜೆಪಿ ಮಾಜಿ ಅಧ್ಯಕ್ಷ ಅಣ್ಣಾಮಲೈ ಅವರು ಶಬರಿಮಲೆಯಲ್ಲಿ ಜನದಟ್ಟಣೆಯಲ್ಲಿ ಸಿಲುಕಿರುವ ಸಣ್ಣ ಹೆಣ್ಣು ಮಗು (ಮಾಲಾಧಾರಿ ಸ್ವಾಮಿ) ಆತಂಕಗೊಂಡಿರುವ ವಿಡಿಯೋವನ್ನು ಹಂಚಿಕೊಂಡಿದ್ದರು.
ಈ ರೀತಿಯ ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಬಿಜೆಪಿ ಹಾಗೂ ಕೇರಳದಲ್ಲಿ ಆಡಳಿತವಿರುವ ಕಮ್ಯುನಿಸ್ಟ್ ಪಾರ್ಟಿ ಪರಸ್ಪರ ಆರೋಪ, ಪ್ರತ್ಯಾರೋಪ ಮಾಡಿಕೊಂಡಿದ್ದವು.
ಇದರ ಕುರಿತು ಹರಿತಲೇಖನಿ ದೊಡ್ಡಬಳ್ಳಾಪುರದಿಂದ ತೆರಳಿರುವ ಮಾಲಾಧಾರಿಗಳ ಮಾಹಿತಿ ಸಂಗ್ರಹಿಸಿ, ಶಬರಿಮಲೆ ಕ್ಷೇತ್ರದ ಪ್ರತ್ಯಕ್ಷ ದರ್ಶನದ ವಿವರಣೆ ಪಡೆದಾಗ, ಕ್ಷೇತ್ರದಲ್ಲಿ ಆರಂಭದಲ್ಲಿ ಸ್ವಲ್ಪ ಜನಸಂಖ್ಯೆ ಹೆಚ್ಚಿತ್ತು ಹೊರತು ಪಡಿಸಿದರೆ. ಈಗ ಪ್ರತಿ ವರ್ಷದಂತೆ ಜನ ದಟ್ಟಣೆ ಸಾಮಾನ್ಯವಾಗಿದೆ.
ದೊಡ್ಡಬಳ್ಳಾಪುರದಿಂದ ಬಂದಿರುವ 9 ಮಂದಿ ಮಾಲಾಧಾರಿಗಳ ತಂಡ ಯಾವುದೇ ಗೊಂದಲವಿಲ್ಲದೆ, ಕೆಲವೇ ನಿಮಿಷಗಳಲ್ಲಿ ಸ್ವಾಮಿಯ ದರ್ಶನ ಪಡೆದಿದ್ದೇವೆ ಎಂದು ಹೇಳಿದ್ದಾರೆ.
ರಜಾ ದಿನವಾದ ಭಾನುವಾರದಂದು ಸ್ವಲ್ಪ ಹೆಚ್ಚಿನ ಭಕ್ತರು ಕ್ಷೇತ್ರಕ್ಕೆ ಬರುತ್ತಾರೆ ಉಳಿದಂತೆ ನಾವು ಕಂಡಂತೆ ಶಬರಿಮಲೆಯಲ್ಲಿ ಯಾವುದೇ ಸಮಸ್ಯೆ ಇಲ್ಲವಾಗಿದ್ದು, ಅಯ್ಯಪ್ಪ ಭಕ್ತರು ಆತಂಕ ಪಡುವ ಸನ್ನಿವೇಶ ಇಲ್ಲವೆಂದು ಮಾಲಾಧಾರಿ ರಾಜಘಟ್ಟ ಯಶವಂತ್ ಸ್ವಾಮಿ ಅವರು ತಿಳಿಸಿದ್ದಾರೆ.
