ರಾಯಚೂರು: ಮಂತ್ರಾಲಯದ (Mantralaya) ಶ್ರೀರಾಘವೇಂದ್ರ ಸ್ವಾಮಿಗಳ ಮಠದ ಯೋಗಿಂದ್ರ ಮಂಟಪದಲ್ಲಿ ಶನಿವಾರ ರಾತ್ರಿ ಮೈಲ್ಸ್ ಲೀಡರ್‌ಶಿಪ್ ವಿಶ್ವವಿದ್ಯಾಲಯದಿಂದ ಏರ್ಪಡಿಸಿದ್ದ ಕಾರ್ಯಕ್ರಮದಲ್ಲಿ ಶ್ರೀಮಠದ ಪೀಠಾಧಿಪತಿಗಳಾದ ಶ್ರೀಸುಬುಧೇಂದ್ರ ತೀರ್ಥ ಶ್ರೀಪಾದಂಗಳವರಿಗೆ ಗೌರವ ಡಾಕ್ಟರೇಟ್ ಪದವಿ ಪ್ರದಾನವನ್ನು ವಿವಿಯ ಕುಲಪತಿ ಡಾ.ಕೆ ರವಿ ಆಚಾರ್ಯ ಹಾಗೂ ಡೀನ್ ಡಾ.ಕೆ.ಟಿ ರಾಜೇಂದ್ರಕುಮಾರ ಅವರು ಪ್ರದಾನ ಮಾಡಿ ಗೌರವಿಸಿದರು.
ಶ್ರೀಪಾದಂಗಳವರಿಗೆ ನೀಡಿರುವುದು ಮೂರನೇ ಗೌರವ ಡಾಕ್ಟರೇಟ್ ಪದವಿಯಾಗಿದೆ. ಮೊದಲನೇ ಬಾರಿಗೆ 2020ರಲ್ಲಿ ಗುಲ್ಬರ್ಗ ವಿಶ್ವವಿದ್ಯಾಲಯದಿಂದ, ಎರಡನೇ ಗೌರವ 2022ರಲ್ಲಿ ಫ್ಲೋರಿಡಾದ ಯೋಗ ಸಂಸ್ಕೃತ ವಿಶ್ವವಿದ್ಯಾಲಯದಿಂದ ನೀಡಲಾಗಿತ್ತು.
ರಾಷ್ಟ್ರಪತಿ ಪ್ರಶಸ್ತಿ ಪುರಸ್ಕೃತ, ಪಂಡಿತ ಕೇಸರಿ, ಮಹಾ ಮಹೋಪಾಧ್ಯಾಯ ಡಾ.ರಾಜಾ ಎಸ್. ಗಿರಿಆಚಾರ್ಯ, ಕರ್ನಾಟಕದ ಹೈಕೋರ್ಟ್‌ನ ನಿವೃತ್ತ ಮುಖ್ಯ ನ್ಯಾಯಮೂರ್ತಿ ಕೆ.ಶ್ರೀಧರರಾವ್, ಎಸ್‌ಜಿಎಸ್ ವಿದ್ಯಾಪೀಠದ ಮಾಜಿ ಕುಲಪತಿ ಡಾ.ವಿ.ಆರ್. ಪಂಚಮುಖಿ, ಮಹಾ ಮಹೋಪಾಧ್ಯಾಯ ಡಾ.ಹರಿದಾಸ ಬೃಹತ್, ಹಾಸನ ವಿವಿಯ ಕುಲಪತಿ ಪ್ರೊ.ಟಿ.ಸಿ ತಾರಾನಾಥ ಮತ್ತಿತರರಿದ್ದರು.
