ಬೆಂಗಳೂರು: ದಿನದಿಂದ ದಿನಕ್ಕೆ ರೂಪಾಯಿ ಮೌಲ್ಯ ಕುಸಿತ, ಅಗತ್ಯ ವಸ್ತುಗಳ ಬೆಲೆ ಏರಿಕೆ ಬೆನ್ನಲ್ಲೆ ಇದೀಗ ವಾಹನಗಳ (Vehicle prices) ಬೆಲೆ ಕೂಡ ಏರಿಕೆಯಾಗಲಿದ್ದು, ಏಪ್ರಿಲ್ ತಿಂಗಳಿಂದ ಹೊಸ ವಾಹನಗಳ ದರದಲ್ಲಿ ಏರಿಕೆ ಯಾಗುವುದರಿಂದ ವಾಹನ ಖರೀದಿಯು ಗ್ರಾಹಕರಿಗೆ ಹೆಚ್ಚುವರಿ ಭಾರವಾಗಲಿದೆ.
ಈಗಾಗಲೇ ವಾಹನ ತಯಾರಿಕಾ ಕಂಪನಿಗಳು ಗ್ರಾಹಕರಿಗೆ ನೀಡಿರುವ ಮಾಹಿತಿಯ ಪ್ರಕಾರ, ಕಾರುಗಳ ದರದಲ್ಲಿ ಸುಮಾರು ಶೇ.4ರವರೆಗೆ ಏರಿಕೆ. ದ್ವಿಚಕ್ರ ವಾಹನಗಳಲ್ಲಿ ಶೇ.2ರ ವರೆಗೆ ಏರಿಕೆ ಆಗುವ ಸಾಧ್ಯತೆ ಇದೆ ಎನ್ನಲಾಗುತ್ತಿದ್ದು, ಉಕ್ಕಿನ ದರದಲ್ಲಿ ಏರಿಕೆ, ವಿದೇಶಿ ಆಮದು ವೆಚ್ಚ ಹೆಚ್ಚಳ, ತಯಾರಿಕಾ ವೆಚ್ಚದ ಭಾರೀ ಏರಿಕೆಯೇ ವಾಹನ ದರ ಏರಿಕೆಗೆ ಪ್ರಮುಖ ಕಾರಣಗಳಿಂದ ಕಂಪನಿಗಳು ದರ ಏರಿಕೆ ಮಾಡಲು ತೀರ್ಮಾನಿಸಿವೆ.
ದರ ಏರಿಕೆಯ ಪರಿಣಾಮವಾಗಿ ಗ್ರಾಹಕರು ಹೆಚ್ಚು ಹಣ ಪಾವತಿಸಬೇಕಾಗಿದ್ದು, 1 ಲಕ್ಷದ ಬೈಕ್ ಖರೀದಿಸಿದರೆ 2,000-3,000 ಹೆಚ್ಚಳ, 2 ಲಕ್ಷದ ವಾಹನ ಖರೀದಿಸಿದರೆ 5,000-6,000 ಹೆಚ್ಚಳ, 5 ಲಕ್ಷದ ಕಾರು 15,000-20,000 ಹೆಚ್ಚಳ, 10 ಲಕ್ಷದ ಕಾರು 40,000-50,000 ಹೆಚ್ಚಳವಾಗುವ ಸಾಧ್ಯತೆಯಿದೆ.
ಇದು ಕೇವಲ ಕೆಲವೇ ವಾಹನಗಳಿಗೆ ಸೀಮಿತವಾಗಿಲ್ಲ. ಸಾಮಾನ್ಯ ಕಾರುಗಳಿಂದ ಹಿಡಿದು ಲಕ್ಸುರಿ ವಾಹನಗಳವರೆಗೂ ದರ ಏರಿಕೆ ಅನ್ವಯವಾಗಲಿದೆ.
ಈ ದರ ಏರಿಕೆಯಿಂದ ಆಟೋ, ಕ್ಯಾಬ್ ಚಾಲಕರು, ವಾಹನ ಆಧಾರಿತ ಜೀವನ ಸಾಗಿಸುವವರು, ಮಧ್ಯಮ ವರ್ಗದ ಕುಟುಂಬಗಳು ಇವರಿಗೆ ಹೆಚ್ಚು ಹೊರೆ ಬೀಳುವ ಸಾಧ್ಯತೆ ಇದ್ದು, ಮಧ್ಯಮ ವರ್ಗದ ಜನರ ಸ್ವಂತ ಕಾರು ಕನಸು ಇದೀಗ ಮತ್ತಷ್ಟು ದೂರ ಸರಿಯುವ ಸಾಧ್ಯತೆ ಇದೆ.
ಈಗಾಗಲೇ ಇಂಧನ ವೆಚ್ಚ ಹೆಚ್ಚಿರುವ ಸಂದರ್ಭದಲ್ಲಿ ಹೊಸ ದರ ಏರಿಕೆ ಗ್ರಾಹಕರಿಗೆ ದೊಡ್ಡ ಸವಾಲಾಗಲಿದೆ. (AI ಚಿತ್ರ ಬಳಸಲಾಗಿದೆ)
