ದೊಡ್ಡಬಳ್ಳಾಪುರ: ಪ್ರಮುಖರ ನಕಲಿ ಫೇಸ್ಬುಕ್ ಖಾತೆ ತೆರೆಯುತ್ತಿರುವ ಆನ್ಲೈನ್ ಖದೀಮರು, ಪರಿಚಿತರಿಗೆ ಮೆಸೆಂಜರ್ ಮೂಲಕ ಸಂದೇಶ ಕಳುಹಿಸಿ ತುರ್ತು ಕಾರಣ ಹಣ ವರ್ಗಾವಣೆ ಮಾಡಬೇಕೆಂದು ಬೇಡಿಕೆಯಿಡುತ್ತಿರುವ ಪ್ರಕರಣಗಳು ತಾಲೂಕಿನಲ್ಲಿ ತೀವ್ರವಾಗುತ್ತಿವೆ.
ಪ್ರಭಾವಿಗಳ ನೈಜ ಖಾತೆಯಲ್ಲಿನ ಪೋಟೋಗಳನ್ನು, ಪ್ರೊಫೈಲ್ ಫೋಟೊ ಆಗಿ ಬಳಸುತ್ತಿರುವ ಖದೀಮರು ಮತ್ತೊಂದು ಖಾತೆ ಸೃಷ್ಟಿಸಿ. ಅವರೊಂದಿಗೆ ಇರುವ ಸ್ನೇಹಿತರಿಗೆ ಫ್ರೆಂಡ್ ರಿಕ್ವೆಸ್ಟ್ ಕಳುಹಿಸಿ ಫ್ರೆಂಡ್ ಮಾಡಿಕೊಳ್ಳುತ್ತಿದ್ದಾರೆ. ನಂತರ ಅನುಮಾನ ಬಾರದಂತೆ ಎಫ್ಬಿ ಮೆಸೆಂಜರ್ ಮೂಲಕ ತುರ್ತು ಕಾರಣವಿದೆ ಫೋನ್ ಪೇ, ಗೂಗಲ್ ಫೇ ಮೂಲಕ ಹಣ ಕಳಿಸಿ ನಾಳೆ ಕೊಡುವೆ ಎಂದು ಸಂದೇಶ ಕಳಿಸುತ್ತಿದ್ದಾರೆ. ವಾಸ್ತವ ತಿಳಿಯದೆ ಮೆಸೇಜ್ ಬಂದ ಕೂಡಲೆ ಆತ್ಮೀಯರಿಗೆ ಕಷ್ಟವೆಂದು ಅಮೌಂಟ್ ಕಳಿಸುತ್ತಾರೆಂದು ಷಡ್ಯಂತ್ರ ರೂಪಿಸಿದ್ದಾರೆ.
ಬುಧವಾರ ರಾತ್ರಿ ಜೆಡಿಎಸ್ ಪಕ್ಷದ ಮುಖಂಡ ಬೀಡಿಗೆರೆ ಗೌರಿಶಂಕರ್ ಹೆಸರಲ್ಲಿ ಹಲೋ. ಹೌ ಆರ್ ಯು? ಎಂದು ವಿನಾಯಕನಗರ ಕೃಷ್ಣಮೂರ್ತಿ ಎನ್ನುವವರಿಗೆ ಮೆಸೇಜ್ ಮಾಡಿರುವ ಖದೀಮರು, ‘ಗೂಗಲ್ ಪೇ ಅಥವಾ ಫೋನ್ ಪೇ ಬಳಸುತ್ತಿದ್ದೀರಾ. ತುರ್ತಾಗಿ 20 ಸಾವಿರ ಕಳುಹಿಸಿ’ ಎಂದು ಮೊಬೈಲ್ ನಂಬರ್ ನೀಡಿದ್ದಾರೆ. ‘ಆದರೆ ಜಾಲದ ಬಗ್ಗೆ ಅರಿತಿದ್ದ ಕೃಷ್ಣಮೂರ್ತಿ, ಗೌರಿ ಶಂಕರ್ ಅವರಿಗೆ ಕರೆ ಮಾಡಿದ್ದು, ಕಿರಾತಕರು ಮಾಡಿರುವ ಷಡ್ಯಂತ್ರ ಬಯಲಾಗಿದೆ.
ಇದೇ ರೀತಿ ಗೌರಿ ಶಂಕರ್ ಅವರ ಅನೇಕ ಗೆಳೆಯರಿಗೆ ಮೆಸೇಜ್ ಮಾಡಿರುವ ಖದೀಮರು ಹಣಕ್ಕೆ ಬೇಡಿಕೆ ಇಟ್ಟಿದ್ದಾರೆ. ಈ ಕುರಿತು ಪೊಲೀಸರಿಗೆ ದೂರು ನೀಡಲು ಗೌರಿಶಂಕರ್ ಮುಂದಾಗಿದ್ದಾರೆ.
ಈ ರೀತಿಯ ಪ್ರಕರಣಗಳು ರಾಜಧಾನಿ ಬೆಂಗಳೂರು ಸುತ್ತಮುತ್ತಾ ಹೆಚ್ಚಾಗಿತ್ತು. ಪೊಲೀಸರ ಖಾತೆಯನ್ನೆ ನಕಲಿ ಮಾಡಿ ಹಣ ಪೀಕಿರುವ ಖದೀಮರು, ಈಗ ಗ್ರಾಮೀಣ ಭಾಗದಲ್ಲಿ ತಮ್ಮ ಕುತಂತ್ರವನ್ನು ಶುರು ಮಾಡಿದ್ದು, ಫೇಸ್ಬುಕ್ ಬಳಕೆದಾರರು ಮುಂಜಾಗ್ರತೆ ವಹಿಸಬೇಕಿದೆ. ಮೆಸೇಜರ್ ಮೂಲಕ ಹಣಕ್ಕೆ ಬೇಡಿಕೆ ಯಾರೇ ಇಟ್ಟರು, ಖುದ್ದಾಗಿ ಕರೆ ಮಾಡಿ ವಾಸ್ತವ ಅರಿಯಬೇಕಿದೆ. ಅಲ್ಲದೆ ಫೇಸ್ಬುಕ್ ಬಳಕೆದಾರರು ಸೆಕ್ಯುರಿಟಿ ಅಳವಡಿಸಿ ಪೊಟೋಗಳು ಅನ್ಯರು ದುರುಪಯೋಗ ಮಾಡಿಕೊಂಡು ವಂಚನೆಗೆ ಒಳಗಾಗುವುದನ್ನು ತಡೆಯಬೇಕಿದೆ.
ಪೊಲೀಸ್ ಠಾಣೆಗೆ ದೂರು ನೀಡಿ: ಇತ್ತೀಚೆಗೆ ಸಾಮಾಜಿಕ ಜಾಲತಾಣ ಬಳಕೆ ತೀವ್ರವಾಗಿದ್ದು, ಖದೀಮರು ಇದನ್ನು ದುರುಪಯೋಗ ಪಡಿಸಿಕೊಂಡು ಹಣ ಕೀಳಲು ಮುಂದಾಗಿರುವ ಪ್ರಕರಣಗಳು ಹೆಚ್ಚುತ್ತಿವೆ. ಈ ಕುರಿತು ಪೊಲೀಸ್ ಇಲಾಖೆ ಜಾಗೃತಿ ಕಾರ್ಯಕ್ರಮಗಳನ್ನು ಆಯೋಜಿಸಿ ಸಾರ್ವಜನಿಕರಿಗೆ ಅರಿವು ಮೂಡಿಸುತ್ತಿದೆ. ಯಾರಾದರೂ ಈ ರೀತಿ ಮೋಸಕ್ಕೆ ಒಳಗಾಗಿದ್ದರೆ, ಕೂಡಲೇ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲು ಮಾಡಬೇಕು, ಈ ಕುರಿತು ಸೈಬರ್ ಕ್ರೈಮ್ ಪೊಲೀಸರು ತನಿಖೆ ನಡೆಸಿ ಖದೀಮರನ್ನು ಬಂಧಿಸಲು ಅನುಕೂಲವಾಗಲಿದೆ. ಅಲ್ಲದೆ ಸಾರ್ವಜನಿಕರು ಇಂತಹ ಷಡ್ಯಂತ್ರಕ್ಕೆ ಬಲಿಯಾಗುವ ಮುನ್ನ ಮುಂಜಾಗ್ರತೆವಹಿಸಬೇಕಿದೆ ಎಂದು ಸರ್ಕಲ್ ಇನ್ಸ್ಪೆಕ್ಟರ್ ಎಂ.ಬಿ.ನವೀನ್ ಕುಮಾರ್ ತಿಳಿಸಿದ್ದಾರೆ.
ಕ್ಷಣ ಕ್ಷಣದ ಮಾಹಿತಿಗಾಗಿ ಹರಿತಲೇಖನಿ ಫೇಸ್ಬುಕ್ ಪುಟ, ಕೂ ಹಾಗೂ ಟ್ವಿಟರ್ ಫಾಲೋ ಮಾಡಿ. ಟೆಲಿಗ್ರಾಂ ಗುಂಪಿಗೆ ಸೇರಿ ನಮ್ಮೊಂದಿಗೆ ಜೊತೆಯಾಗಿ. ಮಾಹಿತಿ ಇಷ್ಟವಾಗಿದ್ದರೆ ಮತ್ತಷ್ಟು ಜನರಿಗೆ ತಲುಪಿಸಲು ಶೇರ್ ಮಾಡಿ….
