ಆ ಊರಿನ ರಸ್ತೆಯಂಚಿನ ಎರಡೂ ಕಡೆ ಕಾಲುವೆ ಹರಿಯುತ್ತಿತ್ತು. ಆ ಕಾಲುವೆಗೆ ಹೊಂದಿಕೊಂಡಿರುವ ಮನೆಗಳಲ್ಲಿ ಕುರಿ, ಕೋಳಿ, ಮೇಕೆ, ಹಸು, ಎಮ್ಮೆ ಸಾಕಲಾಗುತ್ತಿತ್ತು. ಆ ರಸ್ತೆಗೆ ಆ ಕಾಲುವೆಗೆ ಆ ಮನೆಗಳಿಗೆ ಆ ಪ್ರಾಣಿಗಳಿಗೆ ಒಂದಕ್ಕೊಂದು ಸಂಬಂಧವಿತ್ತು. ಇವೆಲ್ಲದಕ್ಕೂ ಕಾಲುವೆ ಆಧಾರವಾಗಿತ್ತು.
ಅಲ್ಲೊಂದು ಕಾಲು ಮುರಿದ ಮೇಕೆಯಿತ್ತು. ತನ್ನ ತುಂಟ ಬುದ್ಧಿಯಿಂದಲೇ ಅದು ಕಾಲು ಮುರಿದುಕೊಂಡಿತ್ತು. ಅದಕ್ಕೆ ಕಾಡೌಷಧಿ ಕೊಡಿಸಿ ಗುಣಪಡಿಸಲು ನೋಡಿದರೂ ಅದರ ಕಾಲು ಮೊದಲಿನಂತಾಗಲಿಲ್ಲ. ಅದಕ್ಕಾಗಿ ಈ ಮೇಕೆಯನ್ನು ಉಳಿದ ಮೇಕೆ ಹಿಂಡಿನಲ್ಲಿ ಮೇಯಲು ಹೊಡೆದುಕೊಂಡು ಹೋಗುತ್ತಿರಲಿಲ್ಲ. ಸ್ವಲ್ಪ ದಿನ ಮೇಕೆಗೆ ಕಾಲ ಕಳೆಯುವುದೇ ಕಷ್ಟವಾಯಿತು. ಕಟ್ಟಿದ ಜಾಗದಲ್ಲಿಯೇ ನಿಂತು ಗೂಟಕ್ಕೆ ಕಟ್ಟಿದ ಹುಲ್ಲನ್ನು ತಿನ್ನಲು ಬೇಸರವಾಯಿತು. ಥರೇಹವಾರಿ ಗಿಡ ತಿಂದು ತೇಗುತ್ತಿದ್ದ ಅದಕ್ಕೆ ನಾಲಿಗೆ ಕೆಟ್ಟಂತಾಗಿ ಸಾಕು ಸಾಕಾಗಿ ಹೋಯಿತು. ದಿನಕಳೆದಂತೆ ಅದು ಊರಿನ ಇತರ ಪ್ರಾಣಿಗಳ ಜೊತೆ ಗೆಳೆತನ ಬೆಳೆಸಿತು. ಕುಂಟು ಕಾಲಿನಲ್ಲಿಯೇ ಊರು ಅಲೆಯುತ್ತಾ ಗೆಳೆಯರ ಗುಂಪನ್ನು ವಿಸ್ತರಿಸಿಕೊಂಡಿತು.
ಆಗ ಮೇಕೆಗೆ ಹೆಚ್ಚು ಗೆಳೆಯರಾಗಿದ್ದು ಕೋಳಿ ಹಿಂಡು. ಅದಕ್ಕೆ ಮುಂದಿನ ಕಾಲನ್ನೆತ್ತಿ ಗಿಡಗಳನ್ನು ಬಾಗಿಸಲು ಮತ್ತು ಗಿಡಗಳ ತುದಿ ಹಿಡಿದುಕೊಂಡು ನಿಲ್ಲಲು ಆಗುತ್ತಿರಲಿಲ್ಲ. ಮುಂಗಾಲುಗಳನ್ನು ಮಡಚಿಕೊಂಡೇ ಮೇಯುತ್ತಿತ್ತು. ಇದರಿಂದ ಕೋಳಿಗಳಿಗೆ ಹಲವಾರು ಲಾಭಗಳಾಗುತ್ತಿದ್ದವು. ಬಗ್ಗಿ ನಿಲ್ಲುತ್ತಿದ್ದ ಮೇಕೆಯ ಹೊಟ್ಟೆಯ ಕೆಳಭಾಗದ ಉಣ್ಣೆಗಳು ಸುಲಭವಾಗಿ ತಿನ್ನಲು ಸಿಗುತ್ತಿದ್ದವು. ಕಾಲುವೆ ಪಕ್ಕದ ಹುಲ್ಲನ್ನು ಮೇಕೆ ತಿನ್ನುವಾಗ ಮಣ್ಣು ಮೆತ್ತಗಿರುವ ಕಾರಣದಿಂದ ಹುಲ್ಲಿನ ಬೇರುಗಳು ಮೇಲೆ ಬಂದು ಅದರ ಬುಡದಲ್ಲಿದ್ದ ಹುಳಗಳು ಕೋಳಿಗಳಿಗೆ ನಿರಾಯಾಸವಾಗಿ ಸಿಕ್ಕು ಮೃಷ್ಟಾನ್ನ ಭೋಜನವಾಗುತ್ತಿತ್ತು.
ಕೋಳಿಗಳು ನೀರನ್ನು ಕುಡಿಯಲು ಹೋದಾಗ ಕಾಲುವೆಯ ನೀರು ಎಟುಕದಿದ್ದರೆ ಮೇಕೆಯ ಮೇಲೆ ಹತ್ತಿ ಕುಡಿಯುತ್ತಿದ್ದವು. ಮೇಕೇಗೂ ಎತ್ತರದ ಗಿಡಗಳ ಎಲೆಗಳನ್ನು ತಿನ್ನಲು ಸಾಧ್ಯವಾಗದಿದ್ದಾಗ ಎಲ್ಲಾ ಕೋಳಿಗಳು ಗಿಡದ ಮೇಲೆ ಹತ್ತಿ ಕುಳಿತು ಕೊಂಬೆಯನ್ನು ಬಾಗಿಸುತ್ತಿದ್ದವು. ಮೇಕೆ ಎಲೆಗಳನ್ನು ತಿಂದು ಖುಷಿಪಡುತ್ತಿತ್ತು. ರಕ್ತ ಹೀರುವ ಉಣ್ಣೆಗಳನ್ನು ತಿನ್ನುವುದರಿಂದ ಮೇಕೆಗೆ ಉಣ್ಣೆ ಕಾಟ ತಪ್ಪಿತ್ತು.
ಒಮ್ಮೆ ಮೇಕೆ ಬಾಗಿ ಹುಲ್ಲು ತಿನ್ನುತ್ತಿದ್ದಾಗ ಕೋಳಿಯೊಂದು ಉಣ್ಣೆ ಹಿಡಿದು ತಿನ್ನುತ್ತಿತ್ತು. ಮೇಯುವತ್ತ ಗಮನ ವಹಿಸಿದ್ದ ಮೇಕೆಯು ಕೋಳಿಯ ಮೇಲೆ ಹಿಕ್ಕೆ ಹಾಕಿಬಿಟ್ಟಿತು. ಸಿಟ್ಟಾದ ಕೋಳಿ ಮೇಕೆಯ ಹೊಟ್ಟೆಗೆ ಜೋರಾಗಿ ಕುಕ್ಕಿತು. ಅವುಗಳು ಪರಸ್ಪರ ಜಗಳವಾಡಿಕೊಂಡವು. ಈ ಸುದ್ದಿ ತಿಳಿದ ಕೋಳಿ ಹಿಂಡು ಮೇಕೆಯ ಮೇಲೆ ಮುನಿಸಿಕೊಂಡಿತು. ‘ನಾವು ಮೇಕೆಗೆ ಎಷ್ಟೊಂದು ಸಹಾಯ ಮಾಡುತ್ತೇವೆ. ಆದರೂ ಅದು ಋುಣ ಮರೆತ ಕೃತಘ್ನ’ ಎಂದು ಬೈದುಕೊಂಡವು. ಮೇಕೆಗೂ ಅದೇ ಭಾವ ಮೂಡಿತ್ತು. ‘ತಮ್ಮ ಹಸಿವಿಗೆ ನನ್ನನ್ನೇ ಉಂಡ ಈ ಕೋಳಿಗಳಿಗೆ ಅದೆಷ್ಟು ಸೊಕ್ಕು. ಕೇಜಿ ತೂಕದ ಕೋಳಿಗಳಿಗೆ ಅಷ್ಟಿರಬೇಕಾದರೆ ನನಗೆಷ್ಟಿರಬೇಡ’ ಎಂದು ಬೀಗಿತು.
ಕೆಲ ದಿನಗಳು ಉರುಳಿದಂತೆ ಕಾಲುವೆಯ ನೀರು ನಿಂತುಬಿಟ್ಟಿತು. ಕಾಲುವೆಯ ಅಕ್ಕಪಕ್ಕದ ಹುಲ್ಲು ಒಣಗಿ ಮೇಕೆಗೆ ಹಸಿವಿನ ಚಿಂತೆ ಹೆಚ್ಚಾಯಿತು. ಉಣ್ಣೆಗಳು ಹೆಚ್ಚಾಗಿ ಸೊರಗಿಹೋಯಿತು. ಕೋಳಿ ಹಿಂಡು ಮಾತ್ರ ಬೇಕಂತಲೇ ಮೇಕೆಯ ಮುಂದೆ ಬಿಂಕದಿಂದ ಓಡಾಡಿಕೊಂಡಿತ್ತು. ಒಂದು ಹುಂಜಕ್ಕೆ ಮಾತ್ರ ಇದು ಸರಿ ಅನಿಸಲಿಲ್ಲ. ಒಂದು ದಿನ ಮೇಕೆಯನ್ನು ಕರೆದುಕೊಂಡು ಬಂದು ‘ಈ ಮೇಕೆ ಏನು ತಪ್ಪು ಮಾಡಿದೆ ಅಂತ ನಾವೆಲ್ಲ ಹೀಗಿರಬೇಕು? ಗೊತ್ತಿಲ್ಲದೆ ಮಾಡಿದ್ದು ತಪ್ಪಲ್ಲ. ನಮ್ಮ ನಮ್ಮ ಅಹಂಕಾರಕ್ಕೆ ಗೆಳೆತನ ಹಾಳಾಗಬೇಕೇ?’ ಎಂದು ಕೋಪ ಮಾಡಿಕೊಂಡಿತು. ಆಗ ತಕ್ಷ ಣ ಮಾತಾಡಿದ ಮೇಕೆ ‘ಇಲ್ಲ ನನ್ನಿಂದಾನೂ ತಪ್ಪಾಗಿದೆ ಕ್ಷ ಮಿಸಿ. ನಮ್ಮಿಬ್ಬರ ಜಗಳ ಎಲ್ಲರಿಗೂ ಬೇಸರ ತಂದಿದೆ. ಮೊದಲಿನ ಹಾಗೆಯೇ ಚೆನ್ನಾಗಿರೋಣ’ ಅನ್ನುತ್ತಾ ಕೋಳಿ ಹಿಂಡನ್ನು ಸೇರಿಕೊಂಡಿತು. ಮೇಕೆಯ ಜೊತೆ ಜಗಳವಾಡಿದ್ದ ಕೋಳಿ ಪುರ್ರನೆ ಹಾರಿ ಮೇಕೆಯ ಮೇಲೆ ಕುಳಿತುಕೊಂಡಿತು.
ಕೃಪೆ: ಸಾಮಾಜಿಕ ಜಾಲತಾಣ.
ಮಾಹಿತಿ ಇಷ್ಟವಾಗಿದ್ದರೆ ಶೇರ್ ಮಾಡಿ: ಕ್ಷಣ ಕ್ಷಣದ ಮಾಹಿತಿಗಾಗಿ ಹರಿತಲೇಖನಿ Facebook, Koo, Dailyhunt ಮೂಲಕ ಫಾಲೋ ಮಾಡಿ. Whatsup, Telegram ಗುಂಪಿಗೆ ಸೇರಿ ನಮ್ಮೊಂದಿಗೆ ಜೊತೆಯಾಗಿ….
