ದೊಡ್ಡಬಳ್ಳಾಪುರ: ತಂದೆಗೆ ಗೌರವಿಸುವ ಸಲುವಾಗಿ ಒಂದು ದಿನ ಗುರುತಿಸಲಾಗಿದ್ದು, ಆ ದಿನದಂದು ತಂದೆಯೊಂದಿಗೆ ಮಕ್ಕಳು ಅಮೂಲ್ಯವಾದ ಸಮಯ ಕಳೆಯಲು ಮೀಸಲಿಡಲಾಗಿದೆ.
ಹೌದು ಈ ವರ್ಷ ಜೂ.15ರಂದು
“ಫಾದರ್ಸ್ ಡೇ” (ಅಪ್ಪಂದಿರ ದಿನ) ಈ ಹಿನ್ನೆಲೆಯಲ್ಲಿ ದೊಡ್ಡಬಳ್ಳಾಪುರ ತಾಲೂಕಿನ ಪ್ರತಿಷ್ಠಿತ ಎಂಎಸ್ವಿ ಪಬ್ಲಿಕ್ ಶಾಲೆ (MSV Public School) ತನ್ನ ವಿದ್ಯಾರ್ಥಿಗಳಿಗಾಗಿ ತಂದೆಯೊಂದಿಗೆ ಸಮಯ ಕಳೆಯುವ ಅವಕಾಶ ಕಲ್ಪಿಸಿದೆ.
ಪುಟಾಣಿ ಮಕ್ಕಳಿಂದ ನೃತ್ಯ, ಗಾಯನ, ಭಾಷಣ, ಅಪ್ಪಂದಿರಿಗೆ ಮೋಜಿನ ಆಟಗಳು, ವಿಜೇತರಿಗೆ ಬಹುಮಾನ ವಿತರಣೆ ಮೂಲಕ ನಿನ್ನೆ (ಜೂ.27) ಎಂಎಸ್ವಿ ಪಬ್ಲಿಕ್ ಶಾಲೆಯಲ್ಲಿ ಫಾದರ್ಸ್ ಡೇಯನ್ನು ಸಂಭ್ರಮದಿಂದ ಆಚರಿಸಲಾಗಿದೆ.
ಕಾರ್ಯಕ್ರಮದ ಮುಖ್ಯ ಅತಿಥಿಗಳಾಗಿ
ಮುಖ್ಯ ಅತಿಥಿಗಳಾಗಿ ದೊಡ್ಡಬಳ್ಳಾಪುರ ಲಯನ್ಸ್ ಕ್ಲಬ್ ಆರ್.ಎಲ್.ಜಾಲಪ್ಪ ಇನ್ಸ್ಟಿಟ್ಯೂಷನ್ ನ ನೂತನ ಅಧ್ಯಕ್ಷ, ಪ್ರೊ.ಕೆ.ಆರ್.ರವಿಕಿರಣ್ (Prof.K.R.Ravikiran) ಭಾಗವಹಿಸಿದ್ದರು.
ಈ ವೇಳೆ ಮಾತನಾಡಿದ ಅವರು, ಅಪ್ಪ ಪ್ರತಿ ಮಗುವಿನ ಬದುಕಿನಲ್ಲಿ ಬೆಳಕು ನೀಡುವ ಸೂರ್ಯ, ಅಪ್ಪ ಅಂದರೆ ಅದ್ಭುತ, ದೊಡ್ಡ ಮಾರ್ಗದರ್ಶಕರು, ದಾರಿ ತೋರುವ ಗುರು, ಮಾದರಿ ಬದುಕನ್ನು ಕಟ್ಟಿಕೊಡುವ ಬಹುದೊಡ್ಡ ವ್ಯಕ್ತಿ. ಬದುಕಿನಲ್ಲಿ ಎಲ್ಲವನ್ನೂ ಧಾರೆಯೆರೆದ ನಿಸ್ವಾರ್ಥಿ.
ನಾವು ಮಾದರಿಯಾಗಿ ಬದುಕುವ ಹಾಗೆ, ಮಕ್ಕಳಲ್ಲಿ ಮಾದರಿ ವ್ಯಕ್ತಿತ್ವವನ್ನು ಬೆಳೆಸುವುದು ಪ್ರತಿಯೊಬ್ಬ ತಂದೆಯ ಜವಾಬ್ದಾರಿಯಾಗಿದೆ. ಒಬ್ಬ ಅಬ್ರಾಹಂ ಲಿಂಕನ್ ನಮಗೆ ಮಾದರಿಯಾಗಿ ನಿಲ್ಲುತ್ತಾರೆ. ಭಾರತದ ಪ್ರಥಮ ಪ್ರಧಾನಿ ಜವಹರಲಾಲ್ ನೆಹರು ತಮ್ಮ ಮಗಳನ್ನು ಬೆಳೆಸಿದ ರೀತಿ ಇಂದಿರಾ ಗಾಂಧಿಯವರನ್ನು ದೇಶಕಂಡ ಅಪ್ರತಿಮ ಪ್ರಧಾನಿಯನ್ನಾಗಿ ಮಾಡಿತು ಎಂದರು.
ಶಾಲೆಯ ಸಂಸ್ಥಾಪಕ ಅಧ್ಯಕ್ಷ ಎ.ಸುಬ್ರಮಣ್ಯ (A.Subramanya) ಮಾತನಾಡಿ, ಅಪ್ಪನ ಕಾಳಜಿ, ಅಮ್ಮನ ಪ್ರೀತಿ ಮಕ್ಕಳಲ್ಲಿ ತುಂಬುವ ಸಂಬಂಧಗಳ ಸಂಸ್ಕಾರ ಹಾಗೂ ಮೌಲ್ಯಗಳನ್ನು ಪ್ರತಿ ಮಗುವಿನಲ್ಲಿ ಮೂಡಿಸಿದಾಗ ಅವು ಅಮೂಲ್ಯ ರತ್ನಗಳಾಗಿ ಬೆಳೆಯುತ್ತವೆ.
ಅಂತಹ ಮಹತ್ತರ ಕಾರ್ಯ ನಿಭಾಯಿಸುವುದು ಅಪ್ಪ ಅನ್ನುವ ಅದ್ಭುತ ಶಕ್ತಿ. ಮಗುವನ್ನು ಹೆಗಲಮೇಲೆ ಕೂರಿಸಿ ವಿಶ್ವವನ್ನೇ ತೋರಿಸುವ ಜೀವ ಅಪ್ಪ. ಇಂತಹ ತಂದೆಗೆ ಶುಭಾಶಯ ತಿಳಿಸುವ ಸುದಿನ ಎಂದು ನುಡಿದರು.
ಈ ವೇಳೆ ಸಂಸ್ಥೆಯ ಉಪಾಧ್ಯಕ್ಷ ಎಸ್.ಸ್ವರೂಪ್, ಟ್ರಸ್ಟಿ ನಯನಾ ಸ್ವರೂಪ್, ಪ್ರಾಂಶುಪಾಲರಾದ ರೆಮ್ಯ ಬಿ.ವಿ ಹಾಗೂ ಶಿಕ್ಷಕ ಶಿಕ್ಷಕೇತರ ಸಿಬ್ಬಂದಿ ವರ್ಗ ಇದ್ದರು.
