ದೊಡ್ಡಬಳ್ಳಾಪುರ: ನಗರದ ಉಪ ವಿಭಾಗಾಧಿಕಾರಿ ಕಚೇರಿಯಲ್ಲಿ ಮಧ್ಯವರ್ತಿಗಳ ಹಾವಳಿ, ದಾಖಲೆಗಳು ಸರಿಯಿದ್ದರೂ ತಿದ್ದಪಡಿ ಪ್ರಕರಣಗಳ ಅನಗತ್ಯ ವಿಳಂಬ, ಭೂಮಿಯ ಬೆಲೆಯ ಆಧಾರದ ಮೇಲೆ ತಿದ್ದುಪಡಿಗೆ ಲಕ್ಷಗಟ್ಟಲೆ ಲಂಚ ನೀಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದ್ದು, ಕಚೇರಿಯಲ್ಲಿ ವ್ಯಾಪಕ ಭ್ರಷ್ಟಾಚಾರ ನಡೆಯುತ್ತಿದೆ ಎಂದು ಪ್ರಾಂತ ರೈತ ಸಂಘದ ಮುಖಂಡರು ಆರೋಪಿಸಿದ್ದಾರೆ.
ಈ ಕುರಿತು ಸುದ್ಧಿಗೋಷ್ಟಿಯಲ್ಲಿ ಮಾತನಾಡಿದ ಪ್ರಾಂತ ರೈತ ಸಂಘದ ಜಿಲ್ಲಾಧ್ಯಕ್ಷ ವೀರಣ್ಣ, ಕಾರ್ಯದರ್ಶಿ ಆರ್.ಚಂದ್ರತೇಜಸ್ವಿ, ದೂರದ ಹೊಸಕೋಟೆ, ನೆಲಮಂಗಲ ತಾಲೂಕುಗಳಿಂದ ಭೂಮಿಯ ತಿದ್ದುಪಡಿಗೆ ವರ್ಷಗಟ್ಟಲೆ ತಿರುಗಿದರೂ ಹಣ ಕೊಡದೆ ತಿದ್ದುಪಡಿಯಾಗುತ್ತಿಲ್ಲ. ಒಂದು ತಿದ್ದುಪಡಿಗೆ ಹಣವನ್ನು ನೀಡುವಂತೆ ಒತ್ತಾಯಿಸಲಾಗುತ್ತಿದೆ. ತಿದ್ದುಪಡಿ ಅಧಿಕಾರವನ್ನು ತಹಶಿಲ್ದಾರ್ ವ್ಯಾಪ್ತಿಯಿಂದ ಜಿಲ್ಲಾ ಉಪ ವಿಭಾಗಾಧಿಕಾರಿಗೆ ನೀಡಿರುವುದರಿಂದ ಪ್ರತಿ ತಾಲೂಕಿನ ರೈತರು ದೂರದ ತಾಲೂಕುಗಳಿಂದ ನಿತ್ಯ ಅಲೆದಾಡುವ ಪರಿಸ್ಥಿತಿ ಏರ್ಪಟ್ಟಿದೆ. ಈ ಮೂಲಕ ಅಧಿಕಾರ ವಿಕೇಂದ್ರಿಕರಣವನ್ನು ಕೇಂದ್ರೀಕರಿಸುವ ಮೂಲಕ ರೈತರಲ್ಲಿ ಹಣ ವಸೂಲಿ ಮಾಡಲು ಅಧಿಕಾರಿಗಳು ಮುಂದಾಗಿರುವುದರಿಂದ ಬಡ ರೈತರು ಸಂಕಷ್ಟದಲ್ಲಿ ಸಿಲುಕಿದ್ದಾರೆ. ಇದಲ್ಲದೆ ಉದ್ದೇಶ ಪೂರ್ವಕವಾಗಿ ದಾಖಲೆಗಳಲ್ಲಿ ಹೆಸರುಗಳನ್ನು ಸರ್ವೆ ನಂಬರುಗಳನ್ನು ತಪ್ಪಾಗಿ ದಾಖಲಿಸಿ ತಿದ್ದುಪಡಿ ಹೆಸರಿನಲ್ಲಿ ವ್ಯಾಪಕವಾಗಿ ಅಧಿಕಾರಿಗಳು ಭ್ರಷ್ಟಾಚಾರಕ್ಕೆ ಇಳಿದಿದ್ದಾರೆ. ಈ ಕುರಿತು ಜಿಲ್ಲಾಧಿಕಾರಿಗಳು ಸಂಬಂಧಪಟ್ಟ ಮಂತ್ರಿಗಳು ಸೂಕ್ತ ಕ್ರಮಕ್ಕೆ ಮುಂದಾಗುವುದಲ್ಲದೆ ತಿದ್ದುಪಡಿ ಅಧಿಕಾರವನ್ನು ಆಯಾ ತಾಲೂಕಿನ ತಹಶಿಲ್ದಾರರಿಗೆ ನೀಡಬೇಕು ಎಂದು ಒತ್ತಾಯಿಸಿದರು.
ವಕೀಲ ರುದ್ರಾರಾಧ್ಯ ಮಾತನಾಡಿ, ಕಂದಾಯ ವ್ಯಾಜ್ಯಗಳನ್ನು ಉಪವಿಭಾಗಾಧಿಕಾರಿ, ತಹಶಿಲ್ದಾರ್ ವ್ಯಾಪ್ತಿಯಿಂದ ತೆಗೆದು, ಇವುಗಳನ್ನು ಸೂಕ್ತವಾಗಿ ನಿರ್ವಹಿಸಲು ಕಂದಾಯ ನ್ಯಾಯಾಧಿಕರಣವನ್ನು ಸ್ಥಾಪನೆ ಮಾಡಬೇಕಿದೆ ಎಂದರು.
ಫೆ.15ರಂದು ಪ್ರತಿಭಟನೆ: ವರ್ಷಗಟ್ಟಲೆ ತಿದ್ದುಪಡಿ ಪ್ರಕರಣಗಳು ಉಳಿಕೆ ಉಳಿದಿದ್ದು, ಉಪ ವಿಭಾಗಾಧಿಕಾರಿಗಳು ಲಂಚ ನಿಗದಿಪಡಿಸುತ್ತಿದ್ದಾರೆ. ಈ ಕುರಿತು ಫೆ.15ರಂದು ಉಪವಿಭಾಗಾಧಿಕಾರಿ ಕಚೇರಿ ಮುಂಭಾಗ ಪ್ರಾಂತ ರೈತ ಸಂಘದಿಂದ ಪ್ರತಿಭಟನೆ ನಡೆಸಲು ನಿರ್ಧರಿಸಿದೆ ಎಂದು ಮುಖಂಡರು ತಿಳಿಸಿದರು.
ಹಕ್ಕೋತ್ತಾಯಗಳು: ಎಲ್ಲಾ ರೀತಿಯ ಕಂದಾಯ ಇಲಾಖೆ ದಾಖಲೆಗಳ ತಿದ್ದುಪಡಿ ಅಧಿಕಾರವನ್ನು ಹಿಂದಿನಂತೆ ತಹಶಿಲ್ದಾರರಿಗೆ ನೀಡಬೇಕು. ಪ್ರಸ್ತುತ ಬಾಕಿ ಇರುವ ಎಲ್ಲಾ ರವಿನ್ಯೂ ದಾಖಲಾತಿಗಳ ತಿದ್ದುಪಡಿಯನ್ನು 15 ದಿವಸಗಳಲ್ಲಿ ಪೂರ್ಣಗೊಳಿಸಬೇಕು. ಈ ಕುರಿತು ನಡೆಯುತ್ತಿರುವ ದಾವೆಗಳ ತೀರ್ಪನ್ನು ತ್ವರಿತವಾಗಿ ನೀಡಬೇಕು. ಅಂತಿಮ ತೀರ್ಪಿಗಾಗಿ ಇರುವ ದಾವೆಗಳಿಗೆ ಕೂಡಲೆ ಆದೇಶ ನೀಡಬೇಕು. ರೈತರು ಹಾಗು ಸಾಮಾನ್ಯರ ಮೇಲೆ ನಡೆಯುತ್ತಿರುವ ಸುಲಿಗೆ ಕೂಡಲೆ ನಿಲ್ಲಿಸಿ, ಈ ಸಂಬಂಧ ಜಿಲ್ಲಾಧಿಕಾರಿ, ಕಂದಾಯ ಇಲಾಖೆ ಅಗತ್ಯ ಕ್ರಮಗಳಿಗೆ ಮುಂದಾಗಬೇಕು. ಈಗಾಗಲೆ ಆದೇಶ ಆಗಿರುವ ಕಡತಗಳನ್ನು ಪುಷ್ ಮಾಡಲು ಸೂಕ್ತ ಕ್ರಮ ವಹಿಸಬೇಕು. ಸರ್ಕಾರದ ಆದೇಶದಂತೆ 6ತಿಂಗಳಿಗೊಮ್ಮ ನಡೆಸುವ ಕಂದಾಯ ಅದಾಲತ್ತು ವಿಳಂಬವಾಗಿದ್ದು, ಕಂದಾಯ ಅದಾಲತ್ ಕೂಡಲೆ ನಡೆಯಬೇಕು. ತಾಲೂಕು ಕಚೇರಿ, ನಾಡ ಕಚೇರಿಗಳಲ್ಲಿ ಆಧಾರ್ ಕೇಂದ್ರಗಳನ್ನು ತೆರೆಯುವಲ್ಲಿ ಜಿಲ್ಲಾಧಿಕಾರಿಗಳು ಕೂಡಲೆ ಕ್ರಮ ತೆಗೆದುಕೊಳ್ಳಬೇಕು. ಇದರೊಂದಿಗೆ ಪಹಣಿಗಳು ಸಕಾಲಕ್ಕೆ ಸಿಗುವಲ್ಲಿ ಆನ್ಲೈನ್ ಸಮಸ್ಯೆ ಬಗೆಹರಿಸುವಲ್ಲಿ ಕಂದಾಯ ಇಲಾಖೆ ಮುಂದಾಗಬೇಕು ಎಂದು ತಮ್ಮ ಹಕ್ಕೋತ್ತಾಯಗಳನ್ನು ಮಂಡಿಸಿದರು.
ಸಭೆಯಲ್ಲಿ ಪ್ರಾಂತ ರೈತ ಸಂಘದ ತಾಲೂಕು ಕಾರ್ಯದರ್ಶಿ ಸಿ.ಎಚ್.ರಾಮಕೃಷ್ಣ, ದೇವನಹಳ್ಳಿ ತಾಲೂಕು ಅಧ್ಯಕ್ಷ ವೆಂಕಟೇಗೌಡ, ಮುಖಂಡರಾದ ವಿಜಯ ಕುಮಾರ್, ರವಿಕುಮಾರ್, ರಮೇಶ್, ರಾಮಚಂದ್ರಪ್ಪ ಮತ್ತಿತರಿದ್ದರು.
ಕ್ಷಣ ಕ್ಷಣದ ಮಾಹಿತಿಗಾಗಿ ಹರಿತಲೇಖನಿ ಫೇಸ್ಬುಕ್ ಪುಟ ಹಾಗೂ ಟ್ವಿಟರ್ ಫಾಲೋ ಮಾಡಿ.ಟೆಲಿಗ್ರಾಂ ಗುಂಪಿಗೆ ಸೇರಿರಿ. ಮಾಹಿತಿ ಇಷ್ಟವಾಗಿದ್ದರೆ ಮತ್ತಷ್ಟು ಜನರಿಗೆ ತಲುಪಿಸಲು ಶೇರ್ ಮಾಡಿ.
