ಕೆ.ಎಂ.ಸಂತೋಷ್, ಆರೂಢಿ (ದೊಡ್ಡಬಳ್ಳಾಪುರ): ಆಡಳಿತಾರೂಢ ಕಾಂಗ್ರೆಸ್ ಸರ್ಕಾರವನ್ನು ಅಧಿಕಾರದಿಂದ ಕೆಡವಲು ಬಿಜೆಪಿ ಬೆಂಬಲಿತ ಕೆಲ ನ್ಯೂಸ್ ಚಾನಲ್ಗಳು (News channels) ಸಿಎಂ ಸಿದ್ದರಾಮಯ್ಯ (Cmsiddaramaiah) ಮತ್ತು ಡಿಸಿಎಂ ಡಿ.ಕೆ. ಶಿವಕುಮಾರ್ (D.K. Shivakumar) ನಡುವೆ ವೈಷಮ್ಯ ಉಂಟುಮಾಡಲು ಪದೇ ಪದೇ ಷಡ್ಯಂತ್ರ ನಡೆಸುತ್ತಿವೆ ಎಂಬುದು ಕಾಂಗ್ರೆಸ್ ವಲಯದ ಆಕ್ರೋಶವಾಗಿದೆ.
ಇದರ ಬೆನ್ನಲ್ಲೇ ಡಿಸಿಎಂ ಡಿ.ಕೆ. ಶಿವಕುಮಾರ್ ಅವರು ನಿನ್ನೆ ಸಂಜೆ ವಿಧಾನಸೌಧದಲ್ಲಿ ಮಾಧ್ಯಮದವರನ್ನು ಉದ್ದೇಶಿಸಿ ಮಾತನಾಡುವ ಸಂದರ್ಭದಲ್ಲಿ ನ್ಯೂಸ್ ಚಾನಲ್ ವರದಿಗಾರ, “ನೀವು ಅಮಿತ್ ಶಾ ಅವರ ಜತೆ ಸಂಪರ್ಕದಲ್ಲಿ ಇದ್ದೀರಿ ಎಂದು ಹೆಚ್.ಡಿ. ಕುಮಾರಸ್ವಾಮಿ ಅವರು ಆಪಾದನೆ ಮಾಡಿದ್ದಾರೆ” ಎಂದು ಹೇಳಿದರು.
ಇದಕ್ಕೆ ಡಿಸಿಎಂ ಅವರು ಪ್ರತಿಕ್ರಿಯೆ ನೀಡಿದರು.
ನಂತರ ಡಿ.ಕೆ. ಶಿವಕುಮಾರ್ ಅವರ ತಂಡ ಪರಿಶೀಲಿಸಿದಾಗ ಕೇಂದ್ರ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ಅವರು ಆ ರೀತಿ ಹೇಳಿಯೇ ಇಲ್ಲ ಎಂಬುದು ತಿಳಿದುಬಂದಿದೆ.
ಸಂಜೆ ಮಾಧ್ಯಮದವರು ಪ್ರಶ್ನೆ ಕೇಳುವಾಗ ಈ ರೀತಿಯ ತಪ್ಪು ಮಾಹಿತಿಯನ್ನು ನೀಡಿ, ಪ್ರತಿಕ್ರಿಯೆ ಪಡೆದಿರುವ ಬಗ್ಗೆ ಡಿ.ಕೆ. ಶಿವಕುಮಾರ್ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಸುಳ್ಳು ಸುಳ್ಳೇ ಮಾಹಿತಿ ಸೃಷ್ಟಿ ಮಾಡಿ, ಸುಳ್ಳು ಪ್ರಶ್ನೆ ಕೇಳಿ ತಂದಿಕ್ಕುವ ಕೆಲಸ ಮಾಡಬಾರದು. ಇದರಿಂದ ಮಾಧ್ಯಮಗಳ ಗೌರವ, ಘನತೆ, ನಂಬಿಕೆಗೆ ಧಕ್ಕೆ ಆಗುತ್ತದೆ.
ಕುಮಾರಸ್ವಾಮಿ ಹೇಳದೇ ಇರೋದನ್ನ ಅವರು ಹೇಳಿದ್ದಾರೆ ಎಂದು ಸುಳ್ಳು ಹೇಳಿ ಪ್ರತಿಕ್ರಿಯೆ ಏಕೆ ಪಡೆಯುತ್ತೀರಿ. ಒಬ್ಬರಿಗೊಬ್ಬರಿಗೆ ತಂದಾಕಿ ಮನೆಹಾಳು ಕೆಲಸ ಮಾಡ್ತಾ ಇದ್ದೀರಿ ನೀವು.
ಮಹತ್ವದ ಕ್ರಾಂತಿ ಅಂತ ಹೇಳಿರಬಹುದು, ಅದ್ ರಾಜಕೀಯವಾಗಿ ಮಾತಾಡಿರಬಹುದು. ಆದರೆ ನೀವು ಹೇಳಿದ್ದೇನು ನನಗೆ..? ಕುಮಾರಸ್ವಾಮಿ ಅವರು, ನೀವು ಅಮಿತ್ ಶಾ ಜೊತೆ ಸಂಪರ್ಕದಲ್ಲಿದ್ದಾರೆ ಎಂದು ಹೇಳಿದ್ದಾರೆ ಎಂದ್ರಿ, ಯಾವ ದಾಖಲೆ ಮೇಲೆ ಹೇಳುದ್ರಿ..? ಅವರು ಹೇಳಿದ್ದಾರೆ ಎಂದಿದಕ್ಕೆ ಮಾನನಷ್ಟ ಮೊಕದ್ದಮೆ ಹಾಕುವೆ ಎಂದು ಹೇಳಿದೆ.
ಅವರು ಹೇಳ್ದೆ ಇದ್ದರೂ ನನಗೆ ಲಿಂಕ್ ಮಾಡ್ತಾ ಇದ್ದೀರಾ, ನೀವೇ ಸೃಷ್ಟಿ ಮಾಡ್ತಾ ಇದ್ದೀರಾ.. ಆಮೇಲೆ ನೋಡುದ್ರೆ ವಿಜಯೇಂದ್ರನ ಹೆಸರು ಹೇಳ್ತಾ ಇದ್ದೀರಾ. ಈ ಕೆಲಸಕ್ಕೆ ಹೋಗಿ ನಿಮ್ಮ ರೆಪಿಟೇಷನ್ ಹಾಳು ಮಾಡಿಕೊಂಡು ನೀವು ಹಾಳಾಗೋದಲ್ಲದೆ, ನಮ್ಮನ್ನೂ ಹಾಳುಮಾಡಬೇಡಿ.
ನಾವು 45 ವರ್ಷ ರಾಜಕಾರಣ ಮಾಡಿಕೊಂಡು ಇಲ್ಲಿವರೆಗೆ ಬದುಕಿದ್ದೇವೆ. ಯಾರಾದ್ರೂ ಹೆಚ್ಚು ಕಡಿಮೆ ಮಾಡಿದರೆ ಯಾವ ಟಿವಿಯನ್ನು ಸುಮ್ಮನೇ ಬಿಡಲ್ಲ, ಬೆನ್ನತ್ತಿ ಬಿಡುತ್ತೇನೆ ಹಿಂದೆ TV 9ಗೆ ಬೆನ್ನತ್ತಿದ್ದಂತೆ ಎಂದು ವಾರ್ನಿಂಗ್ ನೀಡಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
